காணும் கடவுள்கள்.. பாதைகள் தோறும்
01.
காணும் கடவுள்கள்
-----------------------
தொட்டில் சேலையை விலக்கி
கன்னத்தில் ஒருவிரல் வைத்துறங்கும்
மகளை பார்த்து கொண்டிருந்தேன்
தூங்கிற பிள்ளையை பார்க்காதே
என்றாள் அம்மா
திடீரென தூக்கத்தில் சிரித்தாள்
கடவுள் வந்து சிரிக்க வைக்கிறார்
என்றாள் அம்மா
திடுக்கென்று அழுது தூங்கினாள்
காத்து கருப்பு பயம் காட்டுகிதென
தொட்டிலின் கீழ் இரும்புதுண்டை
வைத்தாள் அம்மா
மீண்டும் என் மகள் அழ
அடுக்களையிலிருந்து ஓடிவந்து
கச்சை பால் கொடுத்தாள்
என் மகளின் அம்மா
02.
பாதைகள் தோறும்
------------------------
கடந்த பாதையின் கஷ்டங்கள்
கடந்த பின் தெரிவதில்லை
வருகின்ற பாதையின் வழிகளின்
வரைபடம் கிடைக்கவில்லை
கால்போன போக்கில் போக
கற்ற கல்வி அனுமதிக்கவில்லை
விதிவழி செல்வதற்கு
ஈவேரா போதிக்கவில்லை
விட்டு விட்டு செல்வதற்கு
பாசம் விடுவதில்லை
விடுதலை உணர்வுக்கு தடையிட
முள்வேலிக்கு முறுக்கில்லை
உலகே ஓரணியில் திரண்டாலும்
போராட்டங்கள் ஒடுங்குவதில்லை
கைவிடுவதற்கு முல்லைதீவு ஒன்றும்
முல்லை பெரியாறில்லை
பிரசுரிக்கப்பட்ட திகதி: 2009-12-02