நாற்காலிச் சண்டை.. கரைகளுக்கப்பால்
01.
நாற்காலிச் சண்டை
-----------------------
ஆண்டாண்டாய்
ஒலித்து ஓயும்
இசையில் தொடர்கிறது...
ஆணவக் கூட்டணிகளின்
அதிகாரத்தைப்
புதுப்பித்துக் கொள்ளும்
ஆசன விளையாட்டு
அடிக்கடி ஆடப்படுவதால்
ஆண்டியாகிப் போனது
ஆண்டுப் பொருளாதாரம்
அமர்ந்தவர் வெல்ல
தோற்றவர் கொல்ல
சமநிலை மாறிக்
கதிரைகள் சாய
பூனை பங்கிட்ட
அப்ப மாகிறது
அதிகாரப் பரவலாக்கம்
நாற்காலிச் சண்டையில்
விடுவிக்கப்பட்ட
வறுமையின் குரல் மட்டும்
தெருவெங்கும்
ஒலித்து ஓயும்
இசையாய்த் தொடர்கிறது
02.
கரைகளுக்கப்பால்...
--------------------------
நாளை, நாளையென
எத்தனை நாளைகள்
எத்தனை இரவுகள்
ஒவ்வொரு இரவிலும்
புது விடியலை
நோக்கியதொரு பயணம்
இரவில்தானே எழுதப்படுகின்றன
இலங்கையைத் தழுவும்
அகதிகளின் விடியல்கள்
அகதியிடம்
அகதியாய் வாழும்
அவதி வாழ்க்கை
புதிதாய் தெரிந்த இருள்
இப்போது பழகியதாய்
அந்நியமாய் முறைத்த முகங்கள்
தற்காலிக அந்நியோன்யமாய்
துக்கத்தோடு கூடிய
நலன் விசாரிப்புகள்
துயரத்திலும் சிறுமகிழ்வாய்
இரை மீட்டல்கள்
காத்திருக்கும் அகதிக்கு
ஒத்தடமாய் இதமளிக்க
இன்றாவது கரை தொடுமா
கட்டு மரங்கள்
இதே கடலின்
அடுத்த கரையினில்
அலைகளைத் தாண்டியும்
ஒலித்துக் கொண்டேயிருக்கிறது
அகதியின் அலறல்கள்
பிரசுரிக்கப்பட்ட திகதி: 2010-06-22